Í kjölfar niðurstöðu Alþingiskosninga hefur engum dulist að nauðsynlegt er að fara í ítarlega naflaskoðun á bæði skipulagi og stefnum flokksins. Nú er tíminn til að líta inn á við og spyrja okkur hvert okkar erindi er í þjóðfélaginu, styrkja liðsheildina og skerpa á áherslum okkar.

Því hefur verið ákveðið að hefja þá vinnu með því að halda tvær vinnustofur um framtíð flokksins, hvert hann stefnir, áherslur og innra skipulag.


Fyrsta vinnustofa (HVAÐ?) mun einblína á framtíðarsýn, erindi og stefnu flokksins.

Seinni vinnustofa (HVERNIG?) mun einblína á skipulag flokksins. Nauðsynlegt er að endurskoða og ræða í þaula þætti líkt og kosningakerfi, umboð og formennsku, formlegt ákvarðanatökuferli, stjórnarumhverfi og aðkomu aðildarfélaga.

Fyrsta vinnustofa fer fram laugardaginn 1. febrúar frá 11:00-13:00 á Hverfisgötu 39.


Byrjað verður á því að greina þær áskoranir sem við sem samfélag stöndum frammi fyrir og skoða svo hvert okkar erindi er, hvað við höfum upp á að bjóða og svo í kjölfarið hverjar stefnurnar ættu að vera.

Unnið verður út frá brainstorm session og út frá þeim þemum sem þar birtast verður haldið í áframhaldandi vinnu með þá beinagrind sem við munum hafa í höndunum.
Vinnan fer fram með strangri og skilvirkri fundarstjórn til að tryggja sem bestu afurð innan ramma fundartímans. Mikilvægt er að þátttakendur mæti undirbúnir til að taka þátt í hnitmiðuðum og afkastadrifnum vinnufundi.

Við hvetjum öll sem hafa áhuga á því að koma að uppbyggingu Pírata og láta sig flokkinn varða til að mæta og leggja sitt af mörkum. Hér er tækifærið til að rýna til gagns, láta ljós sitt skína og leggja sitt af mörkum til framtíðar flokksins.

Boðið verður upp á fjarstreymi þar sem fólk getur fylgst með vinnustofunni og sent á okkur hugmyndir í lok vinnustofunnar.


Kær kveðja,

Stefnu- og málefnanefnd