Fjölskylda með ung börn sem hafa fest hér rætur, lært tungumálið og tengst samfélaginu djúpum böndum skal kastað úr landi sama hvað tautar og raular undir því yfirskyni að ráðherra láti einstaka mál og hentisemi ekki hafa áhrif á stjórnsýsluákvarðanir, eins og það sé sjúklega dyggðug og yfirveguð afstaða zenaðs stjórnmálaflokks sem lætur ekki tilfinningaklám hrista upp í sér. Ráðherra sama flokks hleypur þó til og svarar kallinu fljótt og örugglega þegar hagsmunaaðilar krefjast breytinga – sem gera þeim enn auðveldara að halda sem fastast í gróða á sameiginlegum auðlindum þjóðarinnar án þess að þurfa að spreða í lítilræði eins og heilbrigðiseftirlit fyrir neytendur.
Yfirlýsing dómsmálaráðhera sýnir fram á ekkert minna en andlát hugmyndarinnar um að hér ríki réttarríki þar sem öll eru jöfn fyrir lögum og fá sömu málsmeðferð hins opinbera. Á það líka rót víðar í vafasömum tengslum einkaaðila við stjórnmálin.
Eyþór Arnalds, oddviti Sjálfstæðisflokksins í borgarstjórn Reykjavíkur og áður oddviti flokksins á Selfossi, virðist hafa fengið fleiri hundruð milljóna gjöf frá Samherja í gegnum múturfélag og ég hef ítrekað spurt um ástæður þess án fullnægjandi svara. Nú hefur komið í ljós að Samherji stendur að baki uppbyggingu í miðbænum á Selfossi sem Eyþór Arnalds hefur um árabil verið dyggur talsmaður fyrir. Hér gæti verið komin ein ástæða þess að Samherji gaf Eyþóri svo drjúga gjöf sem stór hluti í Morgunblaðinu er. Var það svo að Eyþór fékk þessa gjöf frá Samherja fyrir að tryggja á Selfossi góðan grundvöll og vilja í garð umfangsmikillar uppbyggingar Samherja á Selfossi á meðan hann hafði skipulagsvaldið? Það þarf ekki svo skapandi hugsun til að komast að þeirri niðurstöðu en ekki hefur Eyþór þurft að svara fyrir neitt af þessu svo vel sé.
Kannski ekki furða enda hefur það sýnt sig að Samherji lætur ekki duga að spilla stjórnmálafólki heldur hefur félagið ráðist að atlögu við fjölmiðla- og tjáningarfrelsið af fordæmalausri hörku. Það fjölmiðlafólk sem dirfist að gagnrýna félagið eða velta upp vafasömum atriðum sem réttast væri að Samherji svaraði samviskusamlega fyrir fær á sig kæru og skömm í hattinn og þannig er vegið að starfsöryggi þess með meðfylgjandi kælingaráhrifum. Ekki nóg með það heldur setti Samherji saman heila þáttarröð með því einu fyrir sjónum að gera úti um þann fjölmiðlamann sem hefur staðið sig best í aðhaldi með þessum valdamikla geranda í íslensku samfélagi.
Spillingin flæðir. Það er nokkuð ljóst. Flettist af því rækilega eftir hrun og við eygðum öll von um breytingar með nýrri stjórnarskrá og anda nýrra tíma sem svifu yfir vötnum. Kjarnagildi samfélagsins skyldi loks vera réttlæti og jöfn tækifæri. Vonin var sett ofan í skúffu af Elítuflokknum – Betri en þið hin sem hefur mestan hag af núverandi ástandi þar sem sérhagsmunir fárra fá að ráða í stað almannahags. Ekki er hægt að beita sér til að aðstoða viðkvæma hópa eða bara hinn almenna borgara, ef því er að skipta. En alltaf skulu pálmablöðin lögð yfir pollana fyrir góða vini. Spillingin hefur færst frá baktjaldamakki yfir í sólarljósið án nokkurra afleiðinga. Nú horfir hún beint í augun á okkur hinum og spyr ögrandi: Og hvað þykist þú ætla að gera í því?
Höfundur er borgarfulltrúi Pírata.
