Nú fer fyrsta kjörtímabili Pírata í bæjarstjórninni í Kópavogi að ljúka. Í kosningunum 2018 náðum við þeim markverða árangri að fá inn okkar fyrsta fulltrúa í bæjarstjórn. Nú stefnum við ótrauð að því að bæta við okkur í komandi kosningum. Við höfum sýnt það og sannað að við eigum erindi, rödd okkar Pírata skiptir máli. Við gefum ekkert eftir í baráttunni fyrir grænu velferðarsamfélagi þar sem sem haldið er utan um fjölskyldur og börn, þar sem hugað er að fjölbreyttum þörfum svo að öll geti lifað hér góðu lífi og þar sem hugað er að jafnrétti kynslóða á milli með mikilvægum aðgerðum í þágu loftslagsins.
Meira gagnsæi
Þrátt fyrir að vera í minnihluta hefur bæjarstjórn, fyrir tilstuðlan Pírata í Kópavogi, tekið mikilvæg skref í átt að auknu gagnsæi meðal annars með innleiðingu reglna um hagsmunaskráningu kjörinna fulltrúa um leið og hafið var að birta fylgigögn með fundargerðum. Skref hafa einnig verið stigin í átt að sanngjörnu og aðgengilegu samfélagi fyrir öll með bættu aðgengi að ókyngreindum búningsklefum í sundlaugunum auk þeirrar mikilvægu breytingar í þágu loftslagsins að samþykkja að kolefnisjafna allar ferðir starfsfólks bæjarins á vinnutíma. Ef þetta eru mál sem þú vilt sjá meira af, þá hvet ég þig til að kynna þér Pírata og styðja þessa baráttu.
Prófkjör Pírata
Framundan eru prófkjör Pírata þar sem allt félagsfólk getur tekið þátt í að móta lista fyrir sveitarstjórnarkosningarnar í vor og frestur til framboðs í Kópavogi er 15. febrúar. 18. febrúar verður streymisfundur á Píratar.tv þar sem frambjóðendur í prófkjöri kynna sig og sínar áherslur og vikuna 19. – 26. febrúar stendur kosning í prófkjöri yfir.
Stefnumótun
Önnur leið til þátttöku er með þátttöku í stefnumótun fyrir kosningarnar. Um þessar mundir erum við að vinna að stefnumótun í öllum málaflokkum sveitarstjórnarstigsins fyrir næsta kjörtímabil. Fyrstu drög í nokkrum málaflokkum eru þegar komin í umsagnarferli inn á spjall. piratar.is og upplýsingar um næstu vinnufundi má nálgast á Píratar.is. Þar sem má jafnframt finna yfirlit yfir allara viðburði sem eru framundan eru eins og nýliðakvöldin okkar, en fyrsta þriðjudagskvöld hvers mánaðar er tækifæri til þess að kynna sér störf Pírata og spjalla við kjörna fulltrúa á nýliðakvöldunum okkar.
Mismunandi raddir
Það skiptir máli fyrir lýðræðið að fjölbreyttar raddir heyrist í sveitarstjórnum, nefndum og ráðum en líka innan stjórnmálahreyfinga. Ekki bara þaulæfðar raddir stjórnmálafólks sem er farið að venjast sæti sínu óþarflega vel, heldur raddir fólks sem hefur mismunandi reynslu, bakgrunn og menntunarstig, er af fjölbreyttum kynjum og uppruna og með fjölbreytta færni. Við þurfum þig. Við þurfum allskonar fólk. Ekki hika við að heyra í okkur ef þetta er eitthvað sem kveikir hjá þér neista. Vertu með, taktu þátt. Á hvaða hátt sem hentar þér.
