En ekki bara á jólunum, og ekki bara brauð. Næringarríkar og reglulegar máltíðir hafa umfangsmikil áhrif á farsælan uppvöxt barna, ásamt ást og umhyggju eins og við þekkjum.
Fjárhagserfiðleikar foreldra eiga ekki að bitna á börnum. Raunar er það samþykkt stefna Reykjavíkurborgar. Að þessum róum við öllum okkar árum. Fjárhagsvandi foreldra á ekki og skal ekki að skerða rétt barna til þjónustu eins og leikskóla, grunnskóla, frístundar eða tómstunda.
Meirihluti borgarstjórnar er metnaðarfullur þegar kemur að velferðarmálum og það hefur verið að skila sér. Nýlega kom fram í Kjarnanum að Reykjavíkurborg ber höfuð og herðar yfir önnur sveitarfélög þegar kemur að því að veita öfluga félagsþjónustu og niðurgreiðir í raun félagsþjónustu hinna sveitarfélaganna á höfuðborgarsvæðinu
Aðgerðaáætlun gegn sárafátækt var nýlega kynnt í velferðarráði og samhliða voru samþykktar uppfærðar reglur um fjárhagsaðstoð. Í þeim er tryggður stuðningur við foreldra á fjárhagsaðstoð vegna leikskóla, frístundar og skólamáltíða. Verklagið er í dag þannig að börnum er ekki vísað úr þjónustu vegna fjárhagsvanda foreldra. Þau fá að vera í leikskóla, fá áfram skólamáltíðir og fá inn í frístund, þó svo foreldrar þeirra séu í skuld við borgina. Í meirihlutasáttmálanum er kveðið á um að létta skuli róðurinn fyrir barnafjölskyldur með því að setja þak á greiðslu skólamáltíða. Stuðningur á að vera réttindamiðaður. Fólk ætti að upplifa stuðning sem réttindi en ekki betl eða ölmusu.
Nútímavæðing þjónustu og bætt aðgengi að henni er risastórt verkefni hjá borginni og snýst um að fólk á ekki að þurfa að standa í veseni við að sækja sér þjónustu sem það á rétt á, það ferli á að vera skilvirkt og þægilegt. Við viljum ekki að einstaklingnum fallist hendur við að sækja sér nauðsynlega þjónustu. Þannig sköpum við svigrúm til þess að sérfræðingar borgarinnar geti einbeitt sér að þjónustu fremur en gagnavinnslu og þannig nýtist tíminn betur sem getur skipt sköpum fyrir þá sem mestan stuðninginn þurfa.
Baráttan gegn fátækt barna er okkur hjartans mál, en þetta og fleira til er hluti af þeirri baráttu. Baráttunni við að búa til gott og réttlátt samfélag þar sem öllum getur liðið vel.
Höfundur er fulltrúi Pírata í velferðarráði og skóla- og frístundaráði Reykjavíkurborgar.
