Þingflokkur Pírata fordæmir árásir á kúrdískra borgara í Sýrlandi

Yfirlýsing þingflokks Pírata:

Þingflokkur Pírata fordæmir árásir Tyrkja á kúrdíska borgara í Norður-Sýrlandi sem fer fram með þöglu samþykki flestra NATO-þjóða og hvetur ríkisstjórn Íslands til að taka undir fordæminguna. Okkur ber ávallt skylda til að fordæma ódæðisverk en sér í lagi þegar um er að ræða varnarbandalagsþjóð okkar í NATO sem hefur hafið innrás inn í annað ríki án samþykkis öryggisráðs Sameinuðu þjóðanna eða annarra alþjóðastofnana.

Þingflokkur Pírata lýsir vonbrigðum sínum með svör utanríkisráðherra Íslands við óundirbúinni fyrirspurn Þórhildar Sunnu Ævarsdóttur fyrr í dag. Ráðherra gat ekki svarað til um hvort hann teldi árásir Tyrkja vera ólögmætar og ganga gegn stofnsáttmála Sameinuðu þjóðanna. Né heldur var hann reiðubúinn til þess að fordæma árásir Tyrkja opinberlega. Það er vissulega góðra gjalda vert að koma á framfæri mótmælum við sendiherra Tyrkja í Noregi, en betur má ef duga skal og vilja þingmenn Pírata hvetja ráðherra og ríkisstjórnina alla til þess að taka sér afgerandi stöðu með friði og grundvallarlögum þjóðarréttar í þessu máli. Við hvetjum ríkisstjórnina eindregið til þess að beita sér á alþjóðavettvangi, t.d. innan NATO sem og á vettvangi Evrópuráðsins, gegn ólöglegum árásum Tyrkja.

Sú staðreynd að bandalagsþjóð sem Ísland er í ýmsu alþjóðlegu samstarfi með á sviði bæði stjórnmála og viðskipta setur þær skyldur á herðar íslenskra stjórnvalda og stjórnmálaflokka að fordæma þessar aðgerðir með öllu. Tyrknesk stjórnvöld hafa þegið talsverða styrki frá löndum Evrópu til að bregðast við neyð sýrlenskra flóttamanna, en sú staðreynd að Tyrkir hafa beinlínis stuðlað að auknum fjölda flóttamanna með aðgerðum sínum setur þá styrki í nýtt samhengi. Haldi tyrkneska ríkisstjórnin áfram á þessari braut er ljóst að bandalagsríki hennar verða að endurskoða þessa styrki, sem og önnur alþjóðasamkomulög og beita þrýstingi þar til Tyrkland ákveður að hætta ólögmætum hernaðaraðgerðum með öllu.

Þar er ábyrgð Íslands sú sama og annarra landa. Við getum hvorki falið okkur á bak við fjarlægð né smæð heldur verðum að andmæla og bregðast við mannréttindabrotum og ólöglegum árásarstríðum hjá bandalagsþjóðum, og nýta rödd okkar í þágu þeirra sem þjást.