Prófkjör Pírata er hafið! Því lýkur 13. mars og þá mun liggja fyrir hver skipa efstu sæti á listum Pírata fyrir næstu alþingiskosningar.
Kosningin er rafræn og fer fram í kosningakerfi Pírata, x.piratar.is
Á kjörskrá eru um 3300 manns og hefur þeim fjölgað um rúmlega 500 frá upphafi árs.
Píratar munu bjóða fram í öllum kjördæmum í komandi kosningum. Sameiginlegt prófkjör er fyrir Reykjavíkurkjördæmin tvö.
Prófkjör Pírata er opið öllum, hver sem er gat boðið sig fram og greitt atkvæði. Framboðsfrestur rann út klukkan 14 í gær og þau sem skráðu sig í kosningakerfið fyrir 13. febrúar eru með atkvæðisrétt.
Sem fyrr segir er úrslita prófkjörsins að vænta 13. mars. Allar nánari upplýsingar má nálgast á prófkjörsvef Pírata.
