„Við erum frjálslyndur lýðræðisumbótaflokkur“
Eva Pandora Baldursdóttir opnaði Aðalfund Pírata í gær með opnunarræðu sinni. Þar talaði hún meðal annars um fyrstu skref sín í stjórnmálum, þar sem hún kom inn sem nýliði í Píratastarfið og nokkrum mánuðum síðar var hún kosin inn á þing fyrir Pírata.
Í ræðu sinni ræddi hún líka þá fordóma sem Píratar verða fyrir, flokkurinn er sagður stefnulaus og líkt við skip sem rekur án afláts en þetta gæti ekki verið fjarri sannleikanum í hennar huga þar sem hún segir að Píratar séu frjálslyndur lýðræðisumbótaflokkur sem stefnir að því að breyta stjórnsýslu landsins þannig að hún þjóni þegnum þessa lands.
Þá minntist hún á þann gríðarlega árangur sem þingflokkur og sveitarstjórnarfólk Pírata hefur náð á síðustu árum og nefndi þar sem dæmi afnám bleika skattsins á tíðarvörur, endurskoðun lögræðislaga og tillögur um styttingu vinnuvikunnar. Þá nefndi hún líka að starfið í Píratahreyfingunni mætti efla og betrumbæta með því að styrkja betur grasrótina í hreyfingunni.
Lauk hún svo ræðunni á þeim orðum að Píratar séu „frábær og fjölbreytt hreyfing sem býr yfir mögnuðum mannauð og krafti sem þarf til þess að koma á raunverulegum lýðræðisumbótum í landinu.“
