Píratar í Reykjavík eru stolt af því að tilkynna að samið hefur verið um að næturstrætó muni hefja aftur akstur um helgar í Reykjavík. Þjónustan hefst í nótt, aðfaranótt laugardagsins 25. febrúar, og miðar að því að veita fólki örugga og þægilega leið til að ferðast úr miðbænum eftir skemmtun næturinnar eða eftir vinnu, og um leið að stuðla að skaðaminnkun og öryggisráðstöfunum.
Alexandra Briem, borgarfulltrúi, starfandi oddviti Pírata í Reykjavík, og stjórnarkona í stjórn Strætó bs., hefur barist fyrir því að þjónustan verði tekin upp á ný eftir að henni var hætt síðasta haust. Meirihlutinn í Reykjavík var samþykkur því að næturstrætó skipti máli og var það því niðurstaðan að Reykjavík muni standa straum af því sjálf að borga fyrir aksturinn.
Næturstrætó mun keyra á föstudögum og laugardögum frá 01:30 til 03:30 og mun sjá um akstur fyrir einstaklinga sem ekki geta sjálf keyrt ökutæki. Þjónustan verður á sanngjörnu verði og er aðgengileg fyrir öll, með reglulegum leiðum og tíðum og skilastöðum á tilheyrandi svæðum.
Eitt af meginmarkmiðum næturstrætó er að stuðla að skaðaminnkun og öryggis íbúa og gesta borgarinnar. Með því að bjóða upp á öruggan og áreiðanlegri valkost en að keyra ökutæki eða ferðast á rafhlaupahjóli eða mögulega ganga langa leið heim, miðar þjónustan að því að draga úr hættu á ölvunarakstri, slysum á gangandi vegfarendum og annars konar skaða í tengslum við skemmtun eða vinnu seint á kvöldin.
Þjónustan skiptir einnig höfuðmáli fyrir þau sem vilja frekar taka leigubíl heim, því með þessari aðgerð eykst aðgengi að leigubílum, sem eftir heimsfaraldurinn hafa ekki náð að anna eftirspurn. Nú eru því að auki fjölbreyttari valmöguleikar í boði til þess að koma sér úr miðbænum.
Með því að koma þessari þjónustu á laggirnar vonast borgin til að bæta heildaröryggi og vellíðan borgara sinna sem og gesta hennar, en jafnframt stuðla að ábyrgri og sjálfbærri skemmtana- og vinnumenningu. Næturstrætó er eitt af mörgum átaksverkefnum sem borgin tekur að sér til að skapa öruggt og lifandi samfélag fyrir alla. Þá er einnig vonast til þess að með þessari aðgerð muni hún verða til þess að önnur sveitarfélög á höfuðborgarsvæðinu taki sig til og bætist í hópinn svo Strætó Bs. geti víkkað enn frekar út þjónustu á næturstrætó.
Nánari upplýsingar um næturstrætó er að finna á vef Strætó bs.
