Á borgarstjórnarfundi þann 21. mars greiddu tveir borgarfulltrúar Pírata atkvæði gegn samningi Reykjavíkurborgar, lögreglunnar á höfuðborgarsvæðinu, ríkislögreglustjóra og Neyðarlínunnar um öryggismyndavélar í miðbæ Reykjavíkur. Einn borgarfulltrúi sat hjá.
Aftur á móti studdu allir Píratar í borgarstjórn nauðsynlega breytingu á samkomulaginu sem fól í sér styttan gildistíma samningsins. Greidd voru atkvæði sérstaklega um þá breytingartillögu. Í stað þess að samningurinn gildi til fimm ára án uppsagnarákvæðis gildir hann þess í stað út árið með möguleika á endurnýjun til árs í senn með skýru uppsagnarákvæði.
Píratar munu leiða víðtæka þarfagreiningu og mat á forsendum samkomulagsins þar sem kallað verður eftir umsögnum frá þar til bærum fagaðilum á sviði mannréttinda-, afbrota- og persónuverndarmála og metið hvort samkomulagið samræmist m.a. mannréttindastefnu Reykjavíkurborgar.
Æskilegt er að greiningarvinnunni ljúki sem fyrst og í síðasta lagi fyrir 1. nóvember næstkomandi svo endurskoða megi samkomulagið út frá þeim upplýsingum sem þá liggja fyrir.
Æskilegra hefði verið að slík greining hefði farið fram áður en málið kom til samþykktar, svo hægt hefði verið að taka upplýsta ákvörðun um samninginn. Þá er sérstaklega mikilvægt að vanda til verka við ákvarðanatöku og skoða allar mögulegar afleiðingar þegar um er að ræða ákvarðanir sem koma til með að færa lögreglunni aukin völd og hafa burði til þess að vega að borgaralegum réttindum fólks.
Í ljósi þessa sjónarmiða greiddi meirihluti borgarfulltrúa Pírata atkvæði með málsmeðferðartillögu Sósíalista þess efnis að málinu yrði frestað þar til greining hefur farið fram. Sú tillaga var því miður felld.
Grunnstefna Pírata var skýr leiðarvísir í þessari atkvæðagreiðslu. Píratar leggja áherslu á gagnrýna hugsun og vel upplýstar ákvarðanir og að fyrri ákvarðanir þurfi alltaf að geta sætt endurskoðun. Píratar beita sér fyrir eflingu og verndun borgararéttinda og vernd hinna valdaminni frá misbeitingu hinna valdameiri.
