Auglýst er eftir tilnefningum um fulltrúa í trúnaðarráð Pírata 2017-2018

Framkvæmdaráð Pírata auglýsir eftir tilnefningum um fulltrúa í trúnaðarráð Pírata starfsárið 2017-18.

Hlutverk ráðsins, samkvæmt lögunum, er að bjóða sáttamiðlun og aðstoð þegar upp kemur ágreiningur eða annar vandi í samskiptum og starfi félagsmanna. Til ráðsins geta aðildarfélög, framkvæmdaráð eða félagsmenn leitað til að fá aðstoð. Ráðið getur líka haft frumkvæði að sáttamiðlun ef það telur þörf á því.
Hægt er að leita til trúnaðarráðs með því að senda tölvupóst á trunadarrad@piratar.is

Allir félagsmenn í Pírötum eru hvattir til að tilnefna í trúnaðarráð einstaklinga sem þeir treysta til að sinna verkefninu með sóma, en gott er að láta upplýsingar fylgja með tilnefningunni ef viðkomandi hefur tengda starfsreynslu, menntun eða sérþekkingu. Framkvæmdaráð Pírata skipar þrjá fulltrúa úr innsendum tilnefningum sem þarf svo að staðfesta á löglegum félagsfundi.

Í ljósi aðstæðna þarf að vinna þetta frekar hratt svo við séum með starfandi trúnaðarráð á þessum álagstíma. Frestur til að skila tilnefningum er því til hádegis sunnudaginn 24. september 2017 og stefnir framkvæmdaráð á að leggja tillögu að nýju trúnaðarráði fyrir félagsfund, til staðfestingar, sem haldinn verður kl. 15, sama dag.

Við val á fulltrúum í trúnaðarráð er metin sérstaklega hæfni í mannlegum samskiptum, sjálfstæðum vinnubrögðum og almennt traust meðal flokksmanna. Æskilegt er að þeir hafi áður gegnt trúnaðarstörfum fyrir flokkinn. Fulltrúar í trúnaðarráði skulu ekki gegna öðrum trúnaðarstörfum fyrir flokkinn á meðan þeir sitja í trúnaðarráði.

Tilnefningar sendist á: framkvaemdarad@piratar.is merkt Trúnaðaráð

Reykjavík, 21. september 2017
Framkvæmdaráð Pírata

Um trúnaðarráð Pírata https://piratar.is/um-pirata/log-og-reglur/trunadarrad/
Um trúnaðarráð úr lögum Pírata https://piratar.is/um-pirata/log-og-reglur/#8a