Hversu mikið kostar mannslíf?
Ungir Píratar á Suðurnesjum álykta að Samgönguráðuneytið og Vegagerðin sýni Íslendingum mikla vanvirðingu með því að draga lappirnar þegar kemur að nauðsynlegum vegaframkvæmdum á Grindavíkurvegi, sérstaklega í ljósi nýlegra atvika þar sem tvær konur hafa misst lífið á sama vegakaflanum á fyrstu tveimur mánuðum þessa árs. Grindavíkurvegur er á lista yfir áhættu- og slysamestu vegi landsins. Nú er komið nóg! Öryggi fólks ætti ávallt að vera í fyrirrúmi.
Betrumbætur á Grindavíkurvegi hafa verið hávær krafa Suðurnesjamanna undanfarin ár og skömm er að því að ástandið á honum sé enn ábótavant. Mikið af ungum og óreyndum ökumönnum og ferðamönnum, sem hafa í mörgum tilfellum litla sem enga reynslu af veðurfari og vegakerfi okkar, aka veginn daglega og því geta lagfæringar ekki beðið lengur. Brýnast er að ráðast í tvöföldun vegarins, setja upp viðvörunarskilti og minnka dældir í veginum, algjör lágmarksbreyting er að vegurinn verði lýstur upp.
Eitt líf er einu of mikið og það er til háborinnar skammar að ekki sé vilji til að leggja nauðsynlegt fjármagn í þessar breytingar.
-Stjórn Ungra Pírata á Suðurnesjum
