Aðalfundur Pírata 2018 ályktar:
Þann 16. október 2017 var sett lögbann á fjölmiðil sem fjallaði um vafasama fjármálagjörninga þáverandi forsætisráðherra rétt fyrir hrun íslensku bankanna. Ritskoðun á lögmætri umfjöllun fjölmiðils um kjörinn fulltrúa er með öllu ólíðandi í lýðræðisríki. Aðgerð að þessu tagi mun aldrei teljast annað en valdníðsla.
Við krefjumst þess að lögbann á Stundina verði strax fellt úr gildi.
Því miður er fjölmiðlafrelsi á Íslandi afar bágborið og virðing fyrir tjáningarfrelsinu bágborin, bæði í dag og í sögulegu samhengi.
Alþingi verður að bregðast við þessu lögbanni sem vakið hefur athygli og undrun erlendis. Í ljósi þess hversu stuttu fyrir kosningar lögbannið kom er ekki hægt að útiloka að það hafi verið gert í pólitískum tilgangi. Við skorum því á Alþingi að sjá til þess að aldrei aftur verið slíkt lögbann sett á íslenskan fjölmiðil.
Fullkomið fjölmiðla- og tjáningarfrelsi er nauðsynlegt til þess að traust á íslenskum stjórnmálum endurheimtist. Nefndir og ályktanir þeirra munu aldrei nægja heldur einungis raunverulegar lagabreytingar sem tryggja að fjölmiðlar geti birt vandaða umfjöllun um stjórnmál og stjórnmálafólk án þess að eiga á hættu málsóknir og lögbönn sem fengju aldrei staðist fyrir evrópskum dómstólum.
Við skorum því á Alþingi að stórbæta vernd tjáningarfrelsis á Íslandi, meðal annars með því að leiða lögfesta þingsályktun Alþingis um að Ísland skapi sér afgerandi lagalega sérstöðu varðandi vernd tjáningar- og upplýsingafrelsis. Næg undirbúningsvinna hefur verið unnin, það eina sem þarf fyrir raunverulegt tjáningarfrelsi á Íslandi er pólitískur vilji.
—
Nánari upplýsingar um IMMI https://immi.is
