Breyttar reglur um endurtalningu

Í Reykjavíkurkjördæmum verður ekki endurtalið þó frambjóðendur hafni sæti á lista. Þetta er í samræmi við úrskurð úrskurðarnefndar og ákvörðun stjórnar Pírata í Reykjavík í kjölfarið. Sjá Breyttar reglur um endurtalningu

Þessi texti hefur verið uppfærður til samræmis

Tilkynning um prófkjör: Prófkjör Pírata í Reykjavík mun fara fram dagana 23. til 30. september.

Það mun vera kosið í einu prófkjöri fyrir bæði Reykjavíkur-kjördæmi og síðan skipt í tvo lista á milli þeirra, þannig að sem best samræmi sé milli röðunar í prófkjöri með tilliti til vals frambjóðenda á kjördæmi. Að öllu jöfnu verður gert ráð fyrir að frambjóðandi vilji efsta mögulega sæti miðað við niðurstöðu prófkjörs, en hafi tekið fram hvort kjördæmið hann kýs standi á jöfnu, eða hafi sérstaklega tekið fram ef hann vill einungis koma til greina í öðru kjördæminu.

Reglur um prófkjör Pírata fyrir alþingiskosningar 2017 og skyldur frambjóðenda í prófkjöri Pírata í Reykjavíkurkjördæmum.

  • Frambjóðandi skal vera skráður í Pírata.
  • Frambjóðandi skal tilkynna framboð með tölvupósti til kjördæmaráðs á profkjor2017@piratar.is ., en þar skal koma fram í hvaða kjördæmi hann gefur kost á sér, nafn frambjóðanda, kennitala, staða eða starfsheiti og heimili sem skila þarf með framboðinu svo það sé löglegt. Einnig skal fylgja símanúmer og tölvupóstur þar sem framkvæmdaaðilar prófkjörs og kosninga geta náð í hann.
  • Frambjóðandi skráir sig einnig í prófkjörið á viðeigandi undirþingi í kosningakerfi Pírata á x.piratar.is.
  • Kosning hefst kl. 15:00  þann 23. september 2017 og lýkur klukkan 15:00 laugardaginn 30. september.
  • Öllum skráningum skal lokið fyrir kl 15:00 laugardaginn 23. September. Frambjóðendur þurfa að framkvæma þessar skráningar í tæka tíð svo framboðið teljist löglegt.

Siðareglur framboðsins

  • Frambjóðendur í prófkjöri sýna öðrum frambjóðendum kurteisi og virðingu og koma fram af háttvísi, bæði í ræðu og riti.
  • Frambjóðendur gera grein fyrir öllum þeim hagsmunum sem gætu skipt máli við framboðið.
  • Tilkynna þarf kjördæmaráði eða kosningastjórn um vafasöm atriði í sögu frambjóðanda sem gætu verið dregin fram í dagsljósið við framboð listans.

Með framboðsskráningu samþykkir frambjóðandi að hann hafi kynnt sér eftirfarandi kvaðir sem fylgi framboðinu og samþykki þær

  1. Frambjóðandi skal tilgreina í hvaða kjördæmi hann gefur kost á sér og koma eftirfarandi upplýsingum til kjördæmaráðs, sem skila þarf með framboðinu til að það sé löglegt (skv. landslögum til framboðs til Alþingis):
  • Nafn frambjóðanda
  • Kennitala
  • Staða eða starfsheiti
  • Heimili
  1. Frambjóðandi þarf einnig að koma til kjördæmaráðs símanúmeri og netfangi þar sem hægt sé að ná sambandi við hann í undirbúningi prófkjörs eða kosninga, en þær upplýsingar fara ekki með í opinbera kynningu. Póstfang kjördæmaráðs er profkjör2017@piratar.is
  2. Frambjóðandi samþykkir með undirskrift endanlegt sæti á lista og gefur hann einnig samþykki fyrir umboðsmönnum listans. Þetta skal gert eigi síður en 4 dögum áður en frestur til að skila listanum rennur út, ellegar er heimilt að fella hann af lista.
  3. Með yfirlýsingu um framboð í prófkjöri í kosningakerfi Pírata telst frambjóðandi lýsa því yfir að hann hafi kjörgengi í Alþingiskosningum á Íslandi.
  4. Framboðslistum verður raðað samkvæmt úrslitum forgangskosningar með Schulze-aðferð eftir kosningu í kosningakerfi Pírata. Þó skal frambjóðendum heimilt að víkja sæti og taka lægra sæti á lista en kjör hans segir til um, og færast þá aðrir frambjóðendur ofar á lista með einfaldri færslu. Hafni frambjóðandi sæti er hann fjarlægður af lista og þeir sem neðar sitja færast upp um eitt sæti
  5. Allir félagsmenn sem skráðir hafa verið í Pírata í 30 daga eða lengur munu hafa kosningarétt í prófkjöri Pírata í Reykjavíkurkjördæmum. Dæmi:Þau sem skráðu sig í Pírata 23. ágúst hafa kosningarétt alla dagana en þeir sem skráðu sig í Pírata 30. ágúst hafa kosningarétt 30. september.

Vinsamleg tilmæli til frambjóðenda í prófkjöri

  1. Frambjóðendur eru eindregið hvattir til að bjóða sig ekki fram nema þeir hafi fullan hug á að taka sæti á lista, jafnvel neðar en þeir hefðu óskað sér, sökum þeirrar vinnu og óvissu sem það getur skapað að hafna sæti. Jafnframt er þeim tilmælum eindregið beint til frambjóðenda að lækka sig frekar en segja sig af lista, geti þeir ekki hugsað sér að vera í því sæti sem þeim býðst.
  2. Til að draga úr vinnu við endurútreikninga er mælst til þess að frambjóðendur í Reykjavík tilkynni fyrirfram með tölvupósti á kjörstjórn á profkjor2017@piratar.is
    – Hvaða kjördæmi frambjóðandi velur ef sæti standa á jöfnu.
    – Hámarkssæti sem frambjóðandi vill þiggja og lækka sig í ef hann lendir ofar.
    – Lægsta sæti sem frambjóðandi myndi taka.
  3. Frambjóðendur eru hvattir til að svara eftirfarandi spurningum og birta svörin á framboðs síðunni sinni á x.piratar.is:

    1. Ef þú nærð kjöri til alþingis og seinna kæmi til ágreinings og aðstæðna þar sem þú segðir þig úr flokknum. Myndir þú segja af þér og víkja þingsætinu til varamanns eða starfa áfram sem óháður eða með öðrum flokkum?

  4. 2. Vilt þú að tillögur stjórnlagaráðs verði lagðar til grundvallar frumvarpi að nýrri stjórnarskrá?

    3. Hvaða stefnumál, úr samþykktum stefnum Pírata, þykja þér mikilvægust fyrir komandi kjörtímabil?

    4. Hvað telur þú að þú hafir til brunns að bera sem geri þig að góðum kosti til að gegna þingmennsku fyrir Pírata?

    5. Með hvaða hætti telur þú líklegast að Píratar geti fengið sínum málum framgengt á þingi?

  5. Vegna þeirrar miklu vinnu sem felst í söfnun undirskrifta til staðfestingar lista fyrir kosningar er mælst til þess að frambjóðendur safni tíu til tuttugu undirskriftum sem merki um góðvilja frambjóðenda til framkvæmdaraðila prófkjörsins, sem munu starfa undir mikilli pressu með svo stuttan fyrirvara að kosningum. Þess er ekki krafist, en þetta eru mjög sterk tilmæli til allra frambjóðenda.