Greinar Samstaða, lærdómur og þakklæti

Samstaða, lærdómur og þakklæti

Síðustu vikur hef ég orðið vör við kærkomna tilfinningu allt í kringum mig. Einhvers konar samblöndu af von, eftirvæntingu og bjartsýni sem hefur oft verið af skornum skammti á þessu langa ári sem nú er að líða. Við erum farin að sjá fyrir endann á þessum langdregnu hremmingum og brátt kemur betri tíð með blóm í haga. 

Það verður þó ekki annað sagt en að þetta ár hafi verið lærdómsríkt í meira lagi. Við lærðum betur á tæknina, kynntumst því hvað íslenskt sumar hefur upp á að bjóða og hvað samtakamáttur þjóðarinnar getur verið magnaður. Að sama skapi fengum við góða áminningu um hvað það er margt fólk á Íslandi sem skiptir þjóðfélagið ógnarmiklu máli, þrátt fyrir að vera okkur oft ósýnilegt. 

Fólk sem sér til þess að allt gangi sinn vanagang, sinnir ómissandi þjónustu fyrir okkur bæjarbúa en fær sjaldan viðurkenninguna eða þakkirnar sem það á skilið. Fólkið sem sér um þrif og umönnun, styður við börnin okkar í skólunum og sér til þess að allir komist leiðar sinnar á göngu- og hjólastígum bæjarins svo eitthvað sé nefnt. Það var því gríðarlega ánægjulegt að sveitarfélögin og Efling hafi í ár loks náð saman um löngu tímabærar kjarabætur fyrir þessar stéttir, sem mæddi svo sannarlega mikið á í faraldrinum. Við gætum ekki án þeirra verið.

Við vorum líka minnt á hvað vísindin og sérfræðiþekking skipta okkur miklu máli. Það að fylgja leiðbeiningum okkar færasta fagfólks getur beinlínis greint á milli lífs og dauða. Þökk sé heiðarlegri og gegnsærri upplýsingagjöf höfum við geta tekið upplýstar ákvarðanir og sameinast um stór markmið. Ég vona að við getum haldið því áfram, enda eru stór úrlausnarefni framundan í loftslagsmálum þar sem vísindin þurfa að vera í fyrsta sæti. Hefðbundin þraspólitík mun aldrei geta vísað okkur rétta veginn úr þeim ógöngum.

Þangað til getum við lagt okkar á vogarskálarnar. Síðustu mánuðir hafa sýnt okkur svo ekki verðir um villst hvernig samstaða um breytta hegðun getur skipt sköpum. Með því að nýta samtakamáttinn sem býr í íslensku þjóðinni og setja stefnuna á sjálfbærni munum við auka lífsgæði allra, ekki síst barnanna okkar sem eiga allt undir því að við stöndum okkur vel. Ég legg til að við höfum þetta á bakvið eyrað nú þegar við höldum inn í nýja og bjartari tíma.

Ég óska ykkur öllum gleðilegra jóla og þakka ykkur fyrir samstöðuna, dugnaðinn og úthaldið á árinu sem nú er að líða. 

Upprunaleg birtingKópavogsblaðið

Greinar eftir sama höfund

Senda inn grein